LOS BERRONES

Compartir
Apertura de puertas: 23-30
Precio de taquilla : inv.
Venta anticipada: Invitación al comprar disco en Madrid Rock

Presentando su último disco “LOS BERRONES DIRECTO”

LA HISTORIA DE LOS BERRONES CUNTADA SEGÚN OLEGARIO

(Ya sabéis que les histories dependen de quién les cuente...)

Tamos remontándomos al Cretácico, ya lo sé, pero acuérdome muy bien de aquellos veranos en Tolivia, cuando recalábemos una pila reciella, unos de colexos, otros pa casa la güela, dalgún extranxeru...

Nun yera raro que al escurecer, depués de venir de yerba, mos axuntáremos 12 o 15 rapazos y rapaces pa charrar y enrear per debaxo los horros. (Ahora si mos axuntamos más de 10 ye porque hay una boda o un entierru).

Daquella chábemos partidos en solcampo y andábemos igual que robecos, pero tamién mos entró el merucu de la música.



La primera guitarra que yo tuvi comprómela mi pa na Feria Muestres de Xixón de regalu por haber aprebao 6º E.X.B. Sonaba como una lata sardines afuracá, pero a mí prestóme pola vida. Fui aprendiendo algún que otru acorde mirando pa otros que sabíen tocar. Per entós yo taba nun colexu (en Cheste, Valencia) onde había rapazos que teníen muncha idea de tocar.



Decía yo que esos veranos per Tolivia, depués de meter alguna sabaná de yerba fueron los empecípios de los Berrones. Pero, ¡alto la maniobra! ¡Sin correr!. Daquella nun mos llamábemos asina.

Empezamos tocando les nuestres guitarruques pe los primeros ochenta, Juan Carlos -el negro- y yo. Salíamos -aproximadamente- algo de los Secretos, Victor Manuel, Burning, la Chica de ayer de Nacha Pop, y poco más. Axuntámosmos no que fuere la tiendina so güela: MaríaXuan. (La güela yera María y el güelu Xuan, pero pa nosotros siempre fue un binomiu, diben los dos nel mismu pack)

Enseguida, empezamos a tocar algo inventao porque prestábamos buscar melodiuques, o simplemente como nun sabimos tocar otres coses, inventámosles. La cosa empezaba a prestar y entós Ramón axuntóse con nos pero él tocaba la batería. Bueno, ¡batería! un bote de dixán, otru de colón, un bombo de cuando mio tíu Oscar tocaba la cordión y una especie de chastón que salió de no sé ónde.



¡Ya taba armá! Empezamos a facer roíu y fue la comedia del pueblu. Tuvimos ya el primer local d'ensayu: el correor de la pitera (que yera la antigua casa de la güela de Ramón y Tante). Y claro había que buscar un nome: La banda el mocu, the moretes and the mocu blues band. Hubo varies propuestes pero quedamos con lo de Moretes (por el negro). Tengo una foto daquella.



Y lo primero fue topar un casette y grabar esos ensayos memorables (por caóticos, claro). Neses grabaciones apaecía de todo: cagamentos, improvisaciones, Juaquina la madre de Tante y Ramón chándomos voz, pites cacarexando...Y, en una delles, ¡apaez Tante¡. Tamién conocíu como Gelón. Tante yera más vieyu y ya tenía guitarra con cuerdes de eléctrica y pelos llargos. Yera casi independiente, medio hippy, y nosotros unos mocosucos. Pero venía a veces y machacaba pela guitarra.



Al poco vieno la primera restructuración: El negro llevaba la parte rítmica con la su acústica, Ramón (tamién conocíu como Epi) la batería, Rubén que tamién compró una guitarra, facía el baxu y yo los solos interminables. Les guitarres óyense poco así que buscamos amplificales con una pastilla que tenía Velino y el casette del Negro. Cantábemos Ramón y yo. Y Tante apaecía alguna vez, pero poques porque daquella taba muy ocupáu en andar detrás de les moces. Esta fue la primera formación del grupu y fue entós cuando empezamos a llamamos Berrones. Tamién en alguna cinta que topé per casa traía Berrones blues band. Pero quedó definitivamente esi nombre: BERRONES.



El nombre tien muncho que ver con la llegada de Rubén, porque yera el que siempre andaba muy emberronáu detrás de les moces, como Lomas. Además, Juaquina dicía que lo nuestro yera berrar más que cantar. (Como veis los principios yeren alentadores...)



Tuviemos un par de veranos, polo menos, con esta marcha y en eses maniobres salieron los gérmenes de lo que depués fue la de Sindo el cabreru (el origen fue Mierda, parte 1 y Mierda parte 2), la de la Escuela (el origen fue Arias Tristes, un poema de A. Machado dedicáu a J.R. Jiménez), la de Chacho ( yera una melodía de guitarra sin letra), etc



Tamién hubo temas inéditos como aquel blues que cantaba el Tocata, la danza de la lluvia, vaya fumón, morituri te salutam (en la que metimos una cordión que tocaba yo -mal que bien- y taba concebía casi como una banda sonora), otra sin título na que Ramón tocaba la filarmónica, una que la letra yera un textu de un llibru de Tecnoloxía de Mel... Vamos que trabayábemos más que agora.



Cuando esto fue garrando un poco ambientín, Tante ya quedó definitivu como guitarra solista. Entós hubo una reestructuración radical: Rubén pasó a la batería, Ramón a cantar y tocar algo de acompañamientu guitarreru, yo al baxu y Tante guitarra con ronquiella. El Negro vivía en Xixón y dexó de venir el verano pa Tolivia (empezaría a cortexar y eses coses...) así que aportaba solo de cuando en vez.



Sentáes les bases, el pasu siguiente yera armase de ferramieta. Tenimos un amplificador Sinmarc y una guitarra eléctrica, Squire, que yeren de Velino, el otru hermanu, que tocaba en una orquesta de bodes y romeríes. Tante compró una guitarra Eko del añu matusalén y un ampli Farfisa memorable. La batería taba fecha de retales que fuimos axuntando (lo de mio tíu, algo de Rumasa del Meruxal,...)



Pasaba el tiempu, tábemos na Universidad y los veranos yeren lo máximo. Había que andar a yerba pero tamién andábemos toles fiestes de la Cuenca. Empezamos a escuchar a los Stukas en pleno apogeo. Y empezamos a salir a ver conciertos: Barón Rojo, los Ilegales, los Secretos...



Un día peles fiestes de San Roque, la orquesta de Inacio y Manolo Morán dexómos subir a cantar a Ramón y a mí. Bufff, debió ser insufrible, pero algo ye algo. Otru añu nes fiestes de la castaña en Villoria, anuncióse el debut de los Berrones, pero nun se muy bien cómo fue amagostao; el casu ye que tocamos les guitarres Ramón y yo y Tante la batería porque nun sabía les canciones. (Podeis imaxinavos lo que fue tocar con un batería que nun sabía les canciones, nun sabía tocar la batería y además taba borrachu ....)



Había que entamar vida, así que baxamos a Sama a lo de Musical Antonio, Titi, y merquiamos un equipo completu: una mesa Talmus con dos bafles de 100 w, cuatro micrófonos, una batería Strong, un Marshal y una Ibánez pa Gelón (Tante), un baxu Ibánez,...Con esto fuimos encantaos porque ya se podía meter roíu y podimos cantar, y escuchamos. El primer esfuerzu costómos mil duros al mes a caún con un créditu que sacó Rubén ¡con el R-5 de aval¡



La cosa empezó más en serio, mayábemos tolos dís per aquella ferramienta y fuimos tocando algo más correcto (poco). Rubén empezó a dir a escuela de batería con Titi, Ramón aprendió bien los acordes, yo fui estudiando un métodu de baxu que merquié en Uviéu... La cosa fue funcionando.



A la vez, fue faciéndose ente los guajes lo que ellos llamaben los ultraberrones. Allí taben Julio, Busti, Tocata, Tista, Charli, Michi, Milio, Jorgín, Boby, ...Ellos diben a escuchamos ensayar y pasábenlo pipa o escoyonábense coles coses que facimos.



Tenimos una cinta grabá en el mi casette, en casa mi güela, cantando Ramón y yo colos temas que depués fueron la base de la primera maqueta. Esa cinta fue copiándose y corrió mediu mundo, literalmente. Xente de la Pola, de Xixón, Cerredo, la Villa, ...teníen esa cinta y gustaba muncho. Les canciones ya empezaben a paecer canciones y les lletres llamaben l'atención (Tais de yogur, tienesme apolmonáu, pasamos del porro, mierda pa ti, segaor inútil, vacaciones, la escuela,...)



Así les coses, sal el debut estelar de los Berrones. Histórico. Formación al completo: Rubén a la batería, Tante guitarra, Ramón guitarra y voz, Olegario baxu y voz. La cosa fue en Meruxal, nel patio les escueles. Organiza la Asociación cultural del Meruxal encabezada por Manolín Rumasa, Nardo, Mael, Pepe, etc. Caché del grupu: la merienda ( unos chorizos, un poco xamón y unes botellines de vino; el trasporte de los instrumentos y el escenariu ye cosa de la organización). ¡Ay amigu!, eso sí que fue sonáo, los ultraberrones al completo en Meruxal, el Riomontán enteru espectante,...



Bueno el casu ye que tocamos con muncha voluntad -más que aciertu- y que tuvo muncha repercusión per tul valle, de Villoria pa riba. Como anécdota cuntarevos que fuimos al día siguiente a buscar una púa que había perdio Ramón (bien miserables yeremos que nun tenimos ni pa comprar púes) y quedamos acoyonaos cuando topamos a unos guajes del Meruxal cantando encima l'escenariu la de Mierda pa ti.(Primeros imitadores de Berrones de la historia) ¡Hostia¡ al otru día y acuérdense de algo que oyeron na más una vez!!!. Yera anecdótico, pero buena señal.



Detrás de eso llamáronmos pa tocar na Pola pal pregón de les fiestes de la Virxen del Oteru. Fue gracies a Xuan Ferrera que mos apoyó a güeyos cerraos. Vehículos de trasporte: el Ronda de Mel y el Seiscientos de mi pa. Sería el añu 86 o así. Improvisa con nosotros al teclao Carlinos que tocaba en una orquesta buena. Nun sabía les canciones y yo diba cantando-y los acordes sobre la marcha (Do mayor, mi menor…) Tremendo. Rubén queda tocando con la caja ente les pates porque jodióse el soporte y a lo último, de tan cabriau que taba amecho-y a los platos tan fuerte que cayeron pel escenariu en un final dignu de los Who.



Esta fue muy gorda, la xente empezó a hablar de nosotros. Unos bien y otros mal. Los positivos dicín que de puta madre, algo nuevo, prestoso, etc. Los contrarios: vaya roíu, nun se entiende nada, tan como cencerros (Mira que atrevese a cantar Mierda pa ti delantre tola xente bien de Llaviana...!!)





Tábemos arrancando y estos cuatro rapazos de Tolivia empezaben a dar el saltu: tocamos en Tanes, col equipu de la orquesta Pipa musical, y cobramos 75.000pts, tou un dineral. Depués fuimos a les fiestes de Collanzo. Daquella lo más problemático yera el Mierda pa ti.





En 1987, si nun me falla la memoria, grabamos la primera maqueta en Sama, en musical Antonio, Angel Domenech fixo de técnicu y Titi tocó la de les vacaciones con nosotros en una versión country más mejor que decía él. Esta maqueta copióse más de mil veces. Hubo xente que me dixo que había visto en Londres a un hippy vendiéndola.



Presentamos esta maqueta al concursu de Radio Asturies, los Cuarenta. Presentóse por ver que pasaba. Llevola Ramón l'últimu día del plazu y, nel su estilo más inconfundible, díxoyos: "toma-y, face-y lo que queríais con ella, tira-y-la si nun val pa nada".



Tamién fuimos a un concursu de grupos a Tapia, y tocamos nes fiestes de Barcia (Valdés) per esa época.



En mayu del 88 fue el fallu del concursu: quedamos finalistes. ¡Vaya potra! - pensamos... El premiu yera grabar un single con una discográfica que empezaba: Km 444. Escoyóse el Nun yes tu y Táis de yogur. El resultao fue el single más vendíu de la historia de Asturies. Agotóse enseguida y féxose otra tirada que tamién s'agotó.



Yera xineru del 89, Ramón y yo facimos la mili en Noreña y tábemos hasta los güevos del uniforme, el " a la orden", y la madre que los parió. Pero el ser famosos en un mes diómos muncha "vidilla". Empezamos a grabar el LP Voy dicítelo pe les tardes depués de salir del cuartel.



El discu sal en mayu y la presentación na sala Estilo fue apoteósica. Lleno a reventar, tola xente de la Pola, Villoria, Tolivia, taba allí glayando como condenaos. Presentómos Regina Buitrago, de los Cuarenta, y quixeron comela aquella banda xabalinos. La única pena, y grande, fue que esi día enterrábase el nuestru vecín Santi, con 16 años y fan acérrimu, además de amigu. (Nun sería la única vez que mos coinciden presentaciones con desgracies asina...)



Pero esto ya ye historia actual, como quien diz, y será tema pa la prósima entrega...